পুৰণা ষ্টেট বেংকৰ কাষৰ ফুটপাথত মই৷ পোষ্ট অফিচটোৱে কাষৰ চাহ দোকানখনত চাহ খাই আছিল৷ মোৰ সি কাষলে মাতিলে৷ গম পালোঁ মোৰ ভৰি দুটাত কোনোবাই গোজ মাৰি থৈছে… …নে গজাল মাৰি, লৰচৰ কৰিব নোৱাৰোঁ৷ সোণাৰুজোপাৰ ফুলবোৰ এফালৰ পৰা সৰিব ধৰিছে৷ মোৰ চাৰিওফালে সোণাৰু… …মই লাহে লাহে সোমাই যাব ধৰিছোঁ… …মোৰ সৰু গাঠি, কলাফুল, কঁকাল… …পেট… …বুকু… …চকুৰ আগত অগাদেৱা কৰিলে৷ সেয়া… …চম্পাৱতী নে কমলা কুঁৱৰী৷ ভাঁহি আহিল—
আই মোৰ ভৰি কুটেকুটাই
জোঁৱায়ে তোক নূপুৰ পিন্ধায়…
পুনৰ অভাৰলেপ—
কমলা কুঁৱৰী, মোৰে প্ৰাণেশ্বৰী
পানী বা কিমানে দ…
মণ্টাজ… …সোণাৰু, সোণাৰু… …চাৰিওখালে কেৱল সোণাৰু… …সোমাই গৈছোঁ… উশাহ নোপোৱা হৈছোঁ… …চটফটাইছোঁ… …ঢপঢপাইছোঁ… …লাহে লাহে সোণাৰুবোৰ একোটা কুমজেলেকুৱালৈ ৰূপান্তৰিত হৈছে৷ বগুৱা বাইছে মোৰ কোচত, বুকুত… …ক্ৰমশঃ তাৰ যাত্ৰা মোৰ ওঁঠলৈ… …চেঁচা বিজলুৱা স্পৰ্শ৷ কিবা এটা অদ্ভূত নিচাত চুচৰি বাগৰি উটিছোঁ ভাঁহিছোঁ… …স্পন্দনহীন এক ছন্দ৷ যেন এজাক শেলুৱৈৰ দৃঢ় কামোৰ… …সিঁহতৰ মাজতো দৌৰ… …পিঠিখনত এক অনামী উত্তেজনা… …মই উৰ্দ্ধশ্বাসে দৌৰিলোঁ…
টংগুটি খেলিছোঁ, লাটুমনি বিলৰ পাৰত শামুকে শামুকে যুঁজাইছোঁ— ইমান ইমান পানী/গংগাৰাণী/ইমান ইমান বোকা/চাহেব দাদা— সোমাইছিলোঁ নেকি তেতিয়াই বোকাত৷ হয় হ’বলা৷ চিত্ত নে বিত্ত? দ্বিঘাট সমীকৰণৰ অংক? মেটেকা নে বৰ টেঙাৰ ফুটবল… …চাইবাৰ কেফে নে মেকডনাল্ড… …দে আফটাৰ টুমৰোখন চালি!দৌৰা দৌৰী… …‘বুজিছ সকলো কামৰে নিৰ্দিষ্ট সময় থাকে৷ আজি হোৱা নাই মানে কামটো হোৱাৰ সময় হোৱা নাই৷ চিন্তা নকৰিবি—সময় হ’লে হ’ব৷ পাৰ্থদাই ক’লে৷ মই তেওঁৰো চোলাটো দাঙি দিলোঁ৷ একেই… …কাণৰ কাষত বতাহৰ সুহুৰি— দৌৰ দৌৰ… …ক’ব নোৱৰাকৈ পুনৰ দৌৰীবলৈ আৰম্ভ কৰিলোঁ…
No comments:
Post a Comment